لسلام عليكم ورحمه الله وبركاته
فى البدايه كان ممكن اروى قصه رومانسيه بس حبيت اقدم لكم قصه من حقيقه عاصرتها اتمنى تعجبكم
بطل القصه دى اسمه : السامبو
وحستاذنكم حروى القصه بالعاميه لمعايشتها اكتر
السامبو لما يعدى على القهوه واحنا قاعدين لازم كل الناس تبص له , ويحكوا عنه انه مدوخ الحكومه وماكانش حد يقدر عليه , كنت استغرب !!!
السامبو ولد نوبى نحيف جدا لا بيكلم حد ولا حد بيكلموا , بس حكومه ايه الى يدوخها وانا اصلا لو لطشتوا قلم اموته ؟ !!
وبعدين انا ليا صحاب كتير نوبيين مافيش نوبى صايع لانهم ناس طيبين واهل حضاره ,
فعلا عنصريين شويه وليهم افكار قد نتفق ونختلف عليها مش مهم , لكن فى الاخر هما ناس محترمين وماسمعتش ان فى نوبى تاخر مخدرات , او قاطع طريق او بلطجى ,...
اشمعنا السامبو دا الى كان سفاح ومدوخ الحكومه , غمرنى شعور قاتل بالفضول تجاه الشخصيه دى عايز اتكلم معاه , ازاى مش عارف؟
وفى يوم قاعد على القهوه الصبح بدرى ولقيت مخبرين وامين شرطه وظابط موقفينه قدام القهوه وبيفتشوه وهو رافض ومش ساكت لغايه ما اتكتروا عليه وهات يا ضرب وهو بيحاول يضرب فيهم رغم انهم موتوه من الضرب وبرضو ماسكتش والكبير بتاعهم قالوا : ( وله خلاص مش حاخدك ) وادالهم الامر يسبوا , وبعد ما مات من الضرب وانا قاعد مندهش ومشلول لا قادر اتكلم خايف احصله انا كمان ولا قلبى مطاوعنى اشوف حد كدا , من يومها حبيت السامبو وماعرفش ليه لغايه ما جاتلى شغلانه مراقب شواطئ وبقيت معروف على البحر جدا صحاب المحلات بتوع الشماسى والكافتريات وكل الى ليه علاقه بالشط بقى يحاول بشتى الطرق التقرب منى كلهم الا السامبو ؟؟؟
وبحكم شغلى كنت بروح على البحر بدرى اول واحد قبل النهار ما يطلع وامشى اخر واحد والدنيا بتضلم كدا وبرغم من كدا برضو السامبو لا قرب منى ولا حاول يكلمنى ولا يحتك بيا نهائيا واصلا مكنتش عارف هو بيعمل ايه على البحر ...
كنت بشوفه فى كل حته على الرمله ورا الكباين على الكورنيش طول الوقت فى كل حته السامبو موجود زاد فضولى بيعمل ايه ؟؟؟؟؟؟ ماعرفش ؟؟؟؟
لحد ما فى يوم قاعد الصبح بدرى لوحدى مفيش غيرى على البحر لقيته معدى قولتله (اتفضل يا سامبو ) راح مصبح عليا وكمل فى طريقه ومن ساعتها كل ما نتقابل يسلم عليا وهو ماشى او انا اسلم عليه وفى يوم قابلنى الصبح بدرى على الكورنيش صبح عليا ووقف وطلع سلسله فضه من جيبه وقالى خد دى وهات سبعه جنى انا ادتله عشره جنيه , معرفش شاف الخوف فى عينى ازاى
وقالى ( متخافش انا لقتها على السور بتاع الكورنيش وسابنى ومشى , سيبت الشغل على البحر وعده فتره حوالى سنه ونص ... بتمشى على الكورنيش لقيت السامبو قاعد وقدامه صفيحه جواها بابورجاز وجركن ميا حلوه , بيبيع شاى للبواصه الى على الرصيف .......
البواصه:- هما الناس الى بيصتادوا السمك بالبوصه كهوايه يعنى
وخدنى بالحضن وادانى سيجاره وعاملى كوبايه شاى جامده اوى وسلامات وواحشنى ورحب بيا ترحيب مش متوقعه اطلاقا , لحد ما جا واحد شكله مرعب ومعاه اربع خمس كوبايات وبيقوله اعملى تلاته شاى , راح السامبو قايله ( مش تسلم على السيد ) ؟
فبصيت حواليا مالقتش حد غيرى , راح مسلم عليا ؟ السامبوا قالوا ( السيد دا شاب رجوله قوى وكان معايا فى الحبس ) , وانا مزهول جدا , مين السيد دا ؟ وانهو سجن اللى انا زاملته فيه انا عمرى ما دخلت قسم الا علشان اطلع بطاقه او اقدم للجيش قولت فى بالى يمكن السامبو بيقولوا كدا علشان ميحتكش بيا خصوصا انه شكله غريب ومريب ومشى الراجل المريب دا بعد ما اخد الشاى , لقيت السامبو بيكلمنى وبيعاملنى على انى السيد صاحبه فى الحبس وقالى ( عارف يا عرب انا من يوم ما خرجت من السجن مسبتش البحر انا فاكر كويس يوم ما خرجت من السجن دورت على حته ابات فيها مالقيتش وماكنش معايا فلوس رحت نمت عند الكباين دى على الرمله الى مكانها الكازينو الفخم دلوقتى , والغريبه انى مسقعتش زى ما تكون الرمله بتحضنى وتدفينى , ومن يومها وانا كل حياتى البحر , قعدت تلت شهور ما اشتغلتش , مجرد انى امشى الاقى اللقمه وعلبه السجاير , ازاى معرفش ؟
الجرافه تديلك كبشه سمك تبيعها بسبعه تمانيه جنى , الكازينو يديك شاى , سجاير , المهم فضلت ترزق لحد ما وسعوا الكورنيش والرزق اتقطع يا اخى , وفكرت ارجع للسرقه تانى , بس كنت كبرت فى السن ومش حعرف اسرق , او ان جيت للحق اتكسفت مش عارف يومها جيت قعدت على الرصيف ده وسمعت اتنين بيصتادوا , واحد بيقول للتانى ما تروح تجيب لنا كوبايتين شاى من القهوه احسن التورمس خلص والسمك بياكل خساره نلم ونروح ...
وجت ليا الفكره , ومن ساعتها رحت متصرف وجايب البابور دا والعده دى ولعبت اللعبه دى واهى ماشيه ومستوره , بنجيب اللقمه والسجاير وبنروق دماغنا كمان
ايووووووو نستنى يا اخى خد دى وراح مطلع حته مخدرات وقالى انا عارف انها مش مقامك بس واجب كده على قد ما قسم ) ........
اخدتها منه واستاذنت ومشيت على طول وانا جوايا حاله من الدهشه والاستغراب نزلت مشيت على الرمله وابص للميه واقول مين السيد ده وازاى السامبو ينسانى خالص كده ؟!!!!!!!!!!
ومابقتش عارف احزن ولا افرح ان السامبو حكالى ازاى البحر توبه ؟؟؟؟؟؟؟؟
اتمنى حد يجاوبنى على الاسئله دى دى :
ياترى الطبقه دى فى مجتماعنا عايشين ازاى ؟ ويا ترى لو كان السامبو تاب على ايد البحر فى كام سامبو لسه موجودين وماتبوش ؟
العيب فى الانسان ونشأته ولا الظروف المحيطه الى احيانا بتكون قاسيه ؟
فى النهايه احب اقول
( تعلمت أنه في المدرسة أو الجامعة نتعلم الدروس ثم نواجه الإمتحانات أما في الحياة فإننا نواجه الإمتحانات وبعدها نتعلم الدروس )!!!!!!!!!!
موضوع: صه حقيقيه من كورنيش الاسكندريه 